ფიტნესიჯანმრთელობა

როგორი უნდა იყოს თქვენი პულსი და რატომ აქვს ამას მნიშვნელობა?

ფიტნეს ინსტრუქტორები გვაწვდიან დეტალურ ინფორმაციას ყოველი ვარჯიშის შესახებ, მაგრამ თქვენ ყურადღება არა კონკრეტული ვარჯიშის სტატისტიკას უნდა მიაქციოთ, არამედ დროის განმავლობაში ცვლილებას, პროგრესს. თქვენ შეგიძლიათ, შენიშნოთ პროგრესი, თუ უფრო მეტს დადიხართ ან უფრო კარგი წონა გაქვთ, მაგრამ რასაც არანაკლები ყურადღება უნდა მიაქციოთ, ეს არის პულსი, განსაკუთრებით დასვენების დროს.

დასვენების დროს პულსი გულ-სისხლძარღვთა სისტემის ჯანმრთელობის კარგი მაჩვენებელია.

ალბათ, იცით, რომ რაც უფრო დაბალია დასვენების დროს პულსი, ეს უკეთესია, მაგრამ ცოტამ თუ იცის, ზუსტად რატომ. ამიტომ გავეცნოთ, რას გვეუბნებიან ექსპერტები.

როგორია ჯანსაღი პულსი დასვენებისას?

საბედნიეროდ, დიაპაზონი საკმაოდ დიდია.

ჩვეულებრივ ეს დიაპაზონი 60 და 100-მდე მერყეობს წუთში, მაგრამ, შესაძლოა, სპორტსმენებს კიდევ უფრო დაბალი ჰქონდეთ.

ამხელა დიაპაზონი გამოწვეულია იმით, რომ გულისცემა ბევრ ფაქტორზეა დამოკიდებული – ასაკი, ფიზიკური აქტივობა, სტრესი. იგი დღის განმავლობაშიც კი იცვლება.

რა დაავადებებზე მიგვანიშნებს მაღალი პულსი დასვენების დროს?

რაც უფრო მაღალია პულსი, მით უფრო დიდი დატვირთვით მუშაობს თქვენი გული.

მაღალი პულსის მიზეზი შეიძლება, იყოს სტრესი ან შფოთვა, ან სულაც ასთმა, ანდა ინფექცია.

მუდმივად მაღალი პულსი საკმაოდ სახიფათოა და აუცილებლად უნდა მიმართოთ ექიმს. თუ თავს ცუდად გრძნობთ ან მკერდის არეში ტკივილს, მაშინ დაუყოვნებლივ გესაჭიროებათ სამედიცინო დახმარება.

შეუძლია თუ არა ვარჯიშს, შეამციროს დასვენების დროს პულსი?

გულიც, ისევე როგორც ყველა სხვა კუნთი, უფრო ძლიერი ხდება ვარჯიშით.

რაც უფრო ძლიერია გული, მით უფრო მეტ სისხლს ტუმბავს ყოველი ციკლისას. ეს კი იმას ნიშნავს, რომ აღარ სჭირდება სწრაფად ცემა და პულსი მცირდება.

ასევე ნახეთ:  როგორ მივხვდეთ, გვაქვს თუ არა პროგრესი?

ვარჯიშის დროს როგორი პულსია რეკომენდირებული?

სანამ დავადგენთ რეკომენდირებულ პულსს, საჭიროა განვსაზღვროთ მაქსიმალური პულსი.

ამის გაკეთება ფორმულით შეგვიძლია – 220-ს უნდა გამოაკლოთ თქვენი ასაკი.

იმის მიხედვით, თქვენი მაქსიმალური გულისცემის რა პროცენტს მიაღწევთ, განსაზღვრავს მსუბუქს, თუ ინტენსიურ ვარჯიშებს ასრულებთ.

მსუბუქია ვარჯიში, რომელიც თქვენს გულისცემას მაქსიმალურის 50%-მდე გაზრდის, 50-70%-მდეა საშუალო, ხოლო 70-დან უკვე ინტენსიური.

რეკომენდირებულია, რომ 85%-ს არ გადააჭარბოთ ხანგრძლივი დროის განმავლობაში.

განვიხილოთ მაგალითი 28 წლის მამაკაცისთვის.

გულისცემის მაქსიმალური სიხშირე: 192

მსუბუქი ვარჯიში: 96

საშუალო ინტენსიობის: 96-134

მაღალი ინტენსიობის ინტერვალური ვარჯიში: 163-მდე

რადგან ფიტნეს ტრეკერები მთლად ზუსტი არ არის, არაა აუცილებელი, ზუსტად დაემთხვეს თქვენი გულისცემა მოყვანილ რიცხვებს, მაგრამ ეს დაგვეხმარება ზოგადი წარმოდგენის შექმნაში.