ფიტნესიჯანმრთელობა

ახდენს თუ არა ვარჯიში გავლენას ჰორმონებზე? | ჰორმონები

ვარჯიშზე ფიქრისას, როგორც წესი, გვახსენდება, რომ ის სასარგებლოა ჩვენი ფიზიკური ჯანმრთელობისთვის და ხასიათისთვის, მაგრამ ის ზემოქმედებს ჩვენს ორგანიზმში მიმდინარე ქიმიურ პროცესებზეც. ვარჯიშთანაა დაკავშირებული ჰორმონები და მისი გამოყოფაც.

სხვადასხვა კვლევის თანახმად, მეტი ვარჯიში უკეთესია, შესაბამისად ბევრი ადამიანი ზედმეტს ვარჯიშობს, მაგრამ სინამდვილეში ბევრი ვარჯიშიც ისევე არაა კარგი, როგორც უმოქმედობა. რადგან ვარჯიშს ჰორმონების დონეზე შეუძლია მოქმედება, ამიტომ აუცილებელია ბალანსის პოვნა.

ქვევით ჩამოთვლილია 8 გზა, თუ როგორაა დაკაშირებული ერთმანეთთან ჰორმონები და ვარჯიში:

1. ზრდის ენდორფინის გამოყოფას

ენდორფინი, ალბათ, ყველაზე ცნობილი ჰორმონია.

ეს ჰორმონი ამცირებს ტკივილის შეგრძნებას, იწვევს ეიფორიას და ამცირებს შფოთვას.

გულისცემის აჩქარებას შეუძლია ენდორფინების გამოყოფის მომატება, მაგრამ რეგულარულ ვარჯიშს ძალუძს ენდორფინების მიმართ ორგანიზმის მგრძნობელობის გაზრდა, რაც იმას ნიშნავს, რომ უფრო მარტივად და სწრაფად იმოქმედებს ენდორფინი თქვენზე.

2. არეგულირებს ესტროგენს

ესტროგენი მთავარი ქალური ჰორმონია და ის აუცილებელია ქალის ჯანმრთელობისთვის, მაგრამ დიდი ოდენობით ესტროგენი ზრდის მკერდის კიბოს რისკს.

ვარჯიში არეგულირებს ესტროგენის დონეს და შესაბამისად, ამცირებს მკერდის კიბოს საშიშროებასაც.

3. არეგულირებს კორტიზოლის დონეს

კორტიზოლი ზემოქმედებს ხასიათზე, მოტივაციასა და შიშის გრძნობაზეც კი.

ვარჯიში არეგულირებს ამ ჰორმონის გამოყოფას, განსაკუთრებით დაბალი ინტენსივობის ხანგრძლივი ვარჯიში.

მაღლი ინტენსიურობის ვარჯიშების შემდეგ კი პირიქით, მატულობს კორტიზოლის დონე ორგანიზმში.

4. აუმჯობესებს ინსულინის მიმართ მგრძნობელობას

ვარჯიში ხელს უშლის ინსულინის მიმართ რეზისტენტულობის ჩამოყალიბებას. ეს კი დაგიცავთ ღვიძლში ცხიმების დაგროვებისგან და ღვიძლის დაავადებებისგან.

ამისთვის საუკეთესო ვარჯიშებია მაღალი ინტენსივობის ინტერვალური ვარჯიშები. როგორც უკვე აღვნიშნეთ, ასეთი ვარჯიში კორტიზოლის დონეს ამაღლებს, ამიტომ აუცილებელია ვარჯიშებს შორის ადეკვატურად დასვენება.

ასევე ნახეთ:  6 ფიტნეს ჩვევა, რომლებიც შედეგის მიღწევაში ხელს გიშლით

5. ხელს უწყობს ტესტოსტერონის გამოყოფას

მართალია, ტესტოსტერონი მამაკაცური ჰორმონია, მაგრამ იგი ქალებშიც აუცილებელია კუნთოვანი მასის გაზრდისა და შენარჩუნებისთვის.

მხოლოდ 20 წუთის განმავლობაში ვარჯიშს შეუძლია, სამი საათით გაზარდოს ტესტოსტერონის დონე, ხოლო რეგულარული ვარჯიშის შემთხვევაში საბაზისო დონეც მატულობს.

6. ხელს უწყობს ზრდის ჰორმონის გამოყოფას (HGH)

მაღალი ინტენსივობის ვარჯიშები ხელს უწყობს ზრდის ჰორმონის გამოყოფას.

ინტენსიური ვარჯიშები სიმძიმეებით ვარჯიშთან ერთად არის ზრდის ჰორმონის გაზრდის საუკეთესო მეთოდი.

7. ზრდის ირიზინს 

ირიზინი არის ჰორმონი, რომელიც ახალი აღმოჩენილია. მას ვარჯიშის ჰორმონსაც კი ეძახიან.

ეს ჰორმონი, რომელიც თეთრ ცხიმს ყავისფერ ცხიმად გარდაქმნის, ყველაზე დიდი ოდენობით სიმძიმეებით ვარჯიშისა და გამძლეობაზე ვარჯიშის დროს გამოიყოფა.

ყავისფერი ცხიმი სასარგებლოა ორგანიზმისთვის და ის სხეულის ტემპერატურის რეგულირებაში იღებს მონაწილეობას.

8. ზრდის ადიპონექტინის გამოყოფას

ეს პროტეინის ჰორმონი ხელს უშლის ინსულინის მიმართ რეზისტენტულობისა და მეორე ტიპის დიაბეტის ჩამოყალიბებას; განსაკუთრებით აერობიკული ვარჯიშებისას გამოიყოფა.

როგორც ხედავთ, ზოგადად თქვენი ორგანიზმი, ჰორმონები და ვარჯიში მჭიდრო კავშირშია ერთმანეთთან და ეს უკანასკნელი მძაფრად ზემოქმედებს მათზე.